Аўтар запрашае маленькага чытача ў адмысловае займальнае падарожжа па беларускім алфавіце з прыпынкамі на кожнай літары ад А да Я. У выніку дзіцяці адкрыецца цэлы свет — з людзьмі, жывёламі, раслінамі, прадметамі побыту, заняткамі і прафесіямі, паняццямі і ідэямі. Свет, названы так, а не інакш, нашымі продкамі.

Важная адметнасць «алфавітных» вершаў — яснасць, прастата ў спалучэнні з тонкім гумарам, цёплай усмешкай. Асаблівы каларыт кнізе надаюць цудоўныя ілюстрацыі, выкананыя ўдзельнікамі IV Міжнароднага конкурсу дзіцячага малюнка “На сваёй зямлі”, які праводзіць ГА “Беларускі зялёны крыж”.

Кніжка "Мая сям'я ад А да Я" прызначана для дзяцей малодшага і сярэдняга школьнага ўзросту, таксама можа быць выкарыстана і ў садках для дзяцей старэйшай групы.

Павучок

З сярэбранай слінкі

Ніткі-павуцінкі

Вырабляе павучок,

Спрытна вяжа з іх кружок

Ды кружочак-гамачок

Ён чапляе на сучок.

Муха тоўстая ляцела,

пагайдацца захацела.

Толькі легла на бачок -

Разарваўся гамачок.